पुटिनको प्रस्तावित युक्रेन वार्ता ‘पर्याप्त छैन’ : म्याक्रोन

पोल्यान्ड, २८ वैशाख (रासस/एएफपी) : किएभ र यसका युरोपेली सहयोगीहरूले ३० दिनको युद्धविरामको आह्वान गरेपछि फ्रान्सका राष्ट्रपति इमानुएल म्याक्रोनले आइतबार रुसी राष्ट्रपति भ्लादिमिर पुटिनको रुस र युक्रेनबीच प्रत्यक्ष वार्ताको प्रस्ताव ‘पर्याप्त छैन’ भन्नुभएको छ ।

युक्रेनको यात्राबाट फर्केपछि पोल्यान्डको सहर प्रिजमिस्लमा रेलबाट निस्किँदा म्याक्रोनले पत्रकारहरूलाई भन्नुभयो, “बिना शर्त युद्धविराम वार्ताको माध्यमबाट हुँदैन, ‘पुटिनले’ बाहिर निस्कने उपाय खोजिरहनुभएको छ, तर उहाँ अझै पनि समय किन्न चाहनुहुन्छ ।”

पश्चिमी मित्रराष्ट्रहरूले पुटिनलाई बारम्बार युक्रेनमा सन् २०२२ फेब्रुअरीदेखि चलिरहेको द्वन्द्व अन्त्य गर्ने कुनै पनि सम्भावित प्रयासको सन्दर्भमा ढिलाइको रणनीति अपनाउँदै आएको आरोप लगाउँदै आएका छन् ।

के यो यस्तै अर्को उदाहरण हो भनेर सोधिएको प्रश्नमा म्याक्रोनले जवाफ दिनुभयो, “हो, यो हो ।”

म्याक्रोनले जर्मनी, बेलायत र पोल्यान्डका नेताहरूसँग शनिबार किएभको भ्रमण गर्नुभयो र उहाँहरूमध्ये चारजना र युक्रेनी राष्ट्रपति भोलोदिमर जेलेन्स्कीले सोमबारदेखि ३० दिनको बिना शर्त युद्धविरामको आह्वान गर्नुभयो ।

रुसले पालन नगरे ‘ठूलो प्रतिबन्ध’ को सामना गर्नुपर्ने म्याक्रोनले चेतावनी दिनुभयो ।

नेताहरूका अनुसार संयुक्त राज्य अमेरिका र अन्य देशले प्रस्तावलाई समर्थन गरेका छन् ।

आइतबार बिहान क्रेमलिनमा बोल्दै पुटिनले आगामी दिनमा इस्तानबुलमा युक्रेनसँग प्रत्यक्ष वार्ता गर्ने प्रस्ताव राख्नुभए पनि ३० दिने युद्धविराम प्रस्तावलाई सम्बोधन गर्नुभएन ।

“उहाँ प्रतिबद्ध हुनुहुन्छ भन्ने देखाउँदै र अमेरिकीहरूको नजरमा अस्पष्टता कायम राख्ने कोशिश पनि गर्दै यो उत्तर नदिने तरिका हो”, म्याक्रोनले भन्नुभयो, “हामीले अमेरिकीहरूसँग दृढ भएर उभिनुपर्छ र युद्धविराम बिना शर्त छ भनेर भन्नुपर्छ र त्यसपछि हामी बाँकीबारे छलफल गर्न सक्छौँ ।”

म्याक्रोनले पुटिनको प्रस्ताव ‘युक्रेनीहरूका लागि अस्वीकार्य छ किनभने उनीहरू बम वर्षा भइरहेको बेलामा समानान्तर छलफलहरू स्वीकार गर्न सक्दैनन’ पनि भन्नुभयो ।

सन् २०२२ मा युक्रेनमा रुसले आक्रमण गरेको केही समयपछि त्यहाँ भएको ‘जटिल’ रुसी–युक्रेनी वार्तालाई ध्यानमा राख्दै जेलेन्स्की इस्तानबुलमा वार्ता गर्न सहमत हुनुहुनेछ कि छैन भन्ने कुरामा पनि उहाँले शङ्का व्यक्त गर्नुभयो ।