भैरहवा (रुपन्देही), २४ फागुनः पहिलो पटक प्रधानमन्त्री कप पुरुष क्रिकेट प्रतियोगिताका सम्पूर्ण खेल उपत्यका बाहिर लुम्बिनी प्रदेशमा हुने भएपछि यहाँको क्रिकेट प्रेमीमा उत्साह छाएको छ । प्रधानमन्त्री कपका सम्पूर्ण खेल अहिले लुम्बिनी प्रदेशका तीन वटा खेल मैदानमा हुने भएको छ । यसको लागि तीन वटै खेलमैदानसँगै प्रतियोगिताको सबै तयारी पूरा भएको छ ।
लुम्बिनी प्रदेश क्रिकेट सङ्घको व्यवस्थापनमा हुने प्रतियोगिता आइतबारबाट सुरु हँुदैछ । प्रतियोगिताअन्र्तगत यसपटक ४६ खेल खेलाइने छ । यी सबै खेल रुपन्देहीमा रहेको सिद्धार्थ क्रिकेट रङ्गशाला, तिलोत्तमामा रहेको एकस्ट्राटेक ओभल क्रिकेट रङ्गशाला र दाङको लमहीमा रहेको देउखुरी अन्तरराष्ट्रिय रङ्गशाला मा आयोजना हुँदैछ ।
लुम्बिनी प्रदेश क्रिकेट सङ्घका अध्यक्ष सञ्जय गुरुङका अनुसार यी सबै रङ्गशालामा प्रतियोगिता सञ्चालनका लागि आवश्यक सबै तयारी पूरा भइसकेको छ । प्रतियोगितामा सात वटै प्रदेशका टोली र नेपाली सेना, नेपाल प्रहरी तथा सशस्त्र प्रहरीको विभागीय टोलीसहित १० टोलीले सहभागिता जनाउँदै छन् । यी सबै टोलीले एक अर्कासँग खेल्नुपर्नेछ । गुरुङका अनुसार सबै रङ्गशालामा सबै टोलीले खेल्ने गरी प्रतियोगिताको तालिका मिलाइएको छ ।
यसअनुसार रुपन्देहीको सिद्धार्थ क्रिकेट रङ्गशालामा उद्घाटन र फाइनल खेल गरी सम्मा १७ खेल हुनेछन् । एक्स्ट्राटेक ओभलमा १५ र लमहीको देउखुरी रङ्गशालामा १४ खेल हुनेछन् । गुरुङले प्रधानमन्त्री कप लुम्बिनीमा हुनुले यस क्षेत्रको क्रिकेटसँगै होटल तथा पर्यटन व्यवसाय चलायमान हुने बताउनुभयो ।
“हामी एकदमै उत्साहित छौँ र नेपाल क्रिकेट सङ्घप्रति आभारी छौँ, किनभने पहिलो पटक प्रधानमन्त्री कपका सम्पूर्ण खेल उपत्यका बाहिर हुँदैछन्”, उहाँले भन्नुभयो, “नेपाल क्रिकेट सङ्घ(क्यान)ले क्रिकेटलाई देशको सम्पूर्ण भागमा पु¥याउनुपर्ने उद्देश्यसहित यो निर्णय स्वागत योग्य छ ।”
प्रतियोगिताका लागि भैरहवाको सिद्धार्थ क्रिकेट रङ्गशालामा पिच मर्मतदेखि पेभेलियन व्यवस्थापन एवं अन्य सबै तयारी पूरा भएको रुपन्देही क्रिकेट सङ्घका अध्यक्ष हरिबहादुर थापाले जानकारी दिनुभयो । उहाँले सात दिन अगावैबाट मैदानमा हुने अन्य सबै खेल स्थगित गरी प्रतियोगिताको तयारी गरिएको बताउनुभयो ।
गत वर्ष प्रधानमन्त्री कपअन्तर्गत ११ वटा खेल सिद्धार्थ रङ्गशालामा भएका थिए । यसले नेपाल क्रिकेट सङ्घको विश्वास जित्न ठूलो सहयोग गरेको र त्यसैको फलस्वरुप प्रतियोगिताका अहिले सबै खेलहरु लुम्बिनी प्रदेशमा आउन सफल भएको उहाँको भनाइ छ ।
यसैगरी तिलोत्तमामा रहेको एक्स्ट्राटेक ओभल क्रिकेट रङ्गशालाको पनि सम्पूर्ण तयारी पूरा भएको रङ्गशालाका प्रबन्ध निर्देशक विनोद कुँवरले जानकारी दिनुभयो । नेपालमै पहिलो पटक निजी क्षेत्रबाट ‘फ्लड लाइट’ सहितको क्रिकेट रङ्गशालाको स्थापना गर्नुभएका कुँवरले प्रतियोगिताले लुम्बिनी प्रदेशको क्रिकेटमा रहेको क्षमता देखाउने अवसर मिलेको बताउनुभयो । तीन वटा पिच, फ्लड लाइट, शौचालय, चेन्जिङ रुम पेभेलियनलगायत सबै तयार रहेको उहाँले जानकारी दिनुभयो ।
यसअघि काठमाडौँमा दुई वटा मात्र खेलमैदान भएका कारण राउण्ड रोबिनका आधारमा प्रतियोगिता आयोजना गर्न नेपाल क्रिकेट सङ्घलाई अप्ठ्यारो हँुदै आएको थियो । यसले गर्दा प्रतियोगितालाई काठमाडौँबाट बाहिर लैजाने वातावरण बनेको नेपाल क्रिकेट सङ्घका उपाध्यक्ष रोशन सिंहले बताउनुभयो ।
“पिचलगायत सबै दृष्टिले लुम्बिनी प्रदेशका तीन वटै खेलमैदान उत्कृष्ट भएका कारण क्यानले यहाँ प्रतियोगिताको आयोजना गर्ने निर्णय गरेको हो”, सिंहले भन्नुभयो, “यसले भोलिका दिनमा ‘ए’ ग्रेडका खेलाडीको छनोटका लागि यहाँको भूमिका महत्वपूर्ण हुनेछ ।”
काठमाडाँै बाहिर क्रिकेटको माहौल बनाउन र काठमाडौँ बाहिर क्यानले क्रिकेट गराउन सक्छ भन्ने अन्तरराष्ट्रिय सन्देश दिन प्रतियोगितालाई पहिलो पटक बाहिर लगिएको सिंहले जानकारी दिनुभयो । उहाँले पिच निर्माणका लागि क्यानले नै काठमाडौँबाट जनशक्ति खटाएको बताउनुभयो ।
आइतबारबाट सुरु हुने क्रिकेट प्रतियोगिताको फाइनल खेल आगामी चैत १६ गते भैरहवास्थित सिद्धार्थ क्रिकेट रङ्गशालामा आयोजना हुनेछ ।
