कर्णाली, १३ माघ : कर्णाली प्रदेशका प्रमुख यज्ञराज जोशीले युवाहरूका लागि कर्णाली अवसरको भूमि भएको बताउनुभएको छ ।
परिवर्तनका लागि युवा संस्थाद्वारा कर्णाली प्रदेशको राजधानी वीरेन्द्रनगरमा शुक्रबारदेखि आयोजित ‘कर्णाली युवा महोत्सव’को आज समापन गर्दै प्रदेश प्रमुख जोशीले कर्णाली विविध क्षेत्रको खजना भएको बताउनुभयो । उहाँले भन्नुभयो, “कर्णाली आफैँमा धनी र प्रचुर सम्भावना भएको प्रदेश हो । यहाँ उत्पादित वस्तुले नेपाललाई विश्वमा चिनाउने क्षमता राख्दछ ।”
कर्णालीमा आयोजित युवा महोत्सवले मुलुकमै बसेर केही गर्न सकिने तमाम सम्भावनाका क्षेत्र छन् भन्ने आशा र उत्प्रेरणा जगाउन सघाउने प्रदेश प्रमुख जोशीले बताउनुभयो । उहाँले भन्नुभयो, “युवा देश निर्माणको खम्बा हुन् । राष्ट्रको मेरुदण्ड र भविष्य दुवै हुन् ।” पछिल्लो समयमा बढ्दै गएको युवा पलायन रोक्न र उनीहरूको रोजगारीको प्रबन्ध गर्नतर्फ राज्यले विशेष जोड दिनुपर्ने उहाँको भनाइ थियो ।
महोत्सवमा वरिष्ठ पत्रकार दिलभूषण पाठकले दुई दशक अगाडि कालापहाडबाट आफ्नो जिन्दगी धान्ने कर्णालीमा अहिले महिला उद्यमी बनेर जागिर दिने बन्न सक्ने परिवर्तनले कर्णाली कमजोर नरहेको बताउनुभयो । उमेर र अङ्कले युवा नहुने भन्दै उहाँले सोच तथा योजनाले युवाको पहिचान दिने जनाउनुभयो ।
पूर्वमिस नेपाल सदिच्छा श्रेष्ठले कर्णाली पर्यटनका हिसाबले महत्त्वपूर्ण भूमि भएको उल्लेख गर्दै पर्यटन उद्योगमा सरकार तथा निजी क्षेत्रले प्राथमिकता दिन सकेमा युवा रोजगारी बढ्ने बताउनुभयो । यद्यपि यसमा युवाहरूले नवीनतम सोचलाई उत्पादनतर्फ जोडेर मुलुकको अर्थतन्त्र वृद्धि गर्नमा सघाउनुपर्ने उहाँको भनाइ थियो ।
