यस वर्ष प्रजातन्त्र दिवस तीन दिनसम्म मनाइने

काठमाडौँ, माघ २२ : यस वर्ष प्रजातन्त्र दिवस  तीन दिनसम्म मनाइने भएको छ । राणा शासनको अन्त्य गरी ७ फागुन २००७ मा प्रजातन्त्र स्थापना भएको दिनको सम्झनामा सरकारले यस वर्ष ६, ७ र ८ फागुनलाई भव्य रुपमा मनाउने निर्णय गरेको हो ।

आज प्रधानमन्त्री सुशीला कार्कीको अध्यक्षतामा सिंहदरबारमा बसेको बैठकले तीन दिन प्रजातन्त्र दिवस मनाउने निर्णय गर्दै मूल समारोह समिति पनि गठन गरेको हो ।

प्रधानमन्त्री अध्यक्ष रहने समितिमा मन्त्रीहरु, काठमाडौं उपत्यकाका सबै नगरपालिकाका प्रमुख, नेपाल सरकारका मुख्य सचिव, प्रधान सेनापति, नेपाल सरकारका सचिवहरु, नेपाल प्रहरी, सशस्त्र प्रहरी बल र राष्ट्रिय अनुसन्धान विभागका प्रमुखहरु सदस्य छन् । गृह मन्त्रालयका सचिव मूल समारोह समितिका सदस्य-सचिव छन् ।

निर्णयअनुसार तीन दिनसम्म नेपालभर र विदेशस्थित नेपाली दूतावास, कूटनीतिक नियोग तथा वाणिज्य दूतावासहरुमा विभिन्न कार्यक्रम गरिनेछ । मूल समारोहको कार्यक्रम काठमाडौँको सैनिक मञ्च, टुँडिखेलमा गरिनेछ ।

बैठकमा प्रधानमन्त्री कार्कीले प्रजातन्त्र दिवस हाम्रा लागि एकदमै महत्त्वपूर्ण भएको र यसबीचमा हामीले पटकपटक प्रजातन्त्रका लागि संघर्ष गर्नुपरेको  बताएकी थिइन् । उनले ती सबै आन्दोलन र नेपाली जनताले गरेको बलिदानी र त्यसका उपलब्धिको प्रतीकको रुपमा यो दिन रहेको बताएकी थिइन् । उनले देशमा पछिल्लो समय केही सकारात्मक परिवर्तन देखिन थालेको र २३ र २४ भदौको आन्दोलनले मुलुकमा परिवर्तन ल्याएको बताएकी थिइन् ।

– न्युज एजेन्सी नेपाल