धनगढी, भदौ १३ : सुदूरपश्चिम प्रदेशका मुख्यमन्त्री कमलबहादुर शाहले यस प्रदेशमा लगानीका लागि निजी क्षेत्रलाई स्वागत गर्न प्रदेश सरकार आतुर रहेको बताउनुभएको छ ।
सुदूरपश्चिम लगानी तथा विकास सम्मेलनको सन्दर्भमा आज काठमाडौंमा निजी क्षेत्रसँग आयोजित कार्यक्रममा उहाँले निजी लगानीकर्तालाई स्वागत गर्न आतुर रहेको बताउनुभएको हो ।
लगानी सम्मेलनमार्फत सुदूरपश्चिम प्रदेशलाई राष्ट्रिय, अन्तर्राष्ट्रिय क्षेत्रमा चिनाउन चाहेको उल्लेख गर्दै मुख्यमन्त्री शाहले थप्नुभयो, “सम्मेलनमा सहभागी हुनुस् । सम्भावना अध्ययन गर्दै लगानी गर्नुहोस् । आवश्यक कानुनी व्यवस्था गर्न र लगानी सुरक्षाको ग्यारेन्टी गर्न हामी तयार छौं ।”
कार्यक्रममा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले सुदूरपश्चिमको पर्यटकीय पूर्वाधारमा लगानी गर्न निजी क्षेत्रलाई आग्रह गर्नुभएको छ । उहाँले सुदूरपश्चिम नेचर, कल्चर र एड्भेन्चरको समिश्रण भएको प्रदेश रहेको चर्चा गर्नुभयो । मन्त्री पाण्डेले कानुनी उल्झन सुल्झाएर निजी क्षेत्रलाई विश्वासमा लिइ लगानीको वातावरण सिर्जना गर्नुपर्ने औंल्याउनुभयो ।
