बर्लिन, ३१ वैशाख : संयुक्त राष्ट्रसङ्घका महासचिव महामहिम एन्टोनियो गुटेरेसज्यूले मङ्गलवार सदस्य राष्ट्रहरूलाई राष्ट्रसङ्घको शान्ति स्थापनासम्बन्धी पहलहरूलाई सशक्त रुपमा अघि बढाउन ‘आ–आफ्ना वित्तीय दायित्वहरू समयमै र पूर्ण रूपमा निर्वाह गर्न’ विनम्रतापूर्वक आग्रह गर्नुभएको छ ।
बर्लिनमा आयोजित मन्त्रीस्तरीय सम्मेलनमा सम्बोधन गर्दै महामहिम गुटेरेसले वर्तमान विश्व परिवेशलाई स्मरण गराउँदै भन्नुभयो, “संयुक्त राष्ट्रसङ्घ स्थापना भएयता अहिलेसम्मकै सर्वाधिक द्वन्द्वको अवस्था देखिएको र यस्ता कठिन समयमा हामी सबैको साझा प्रतिबद्धता र सहयोग अत्यावश्यक छ ।”
उहाँले थप प्रस्ट पार्नुभयो, “हाल हाम्रो सबै प्रकारको कार्यमा वित्तीय चुनौती देखिएको छ । यस सन्दर्भमा सदस्य राष्ट्रहरूले आफ्नो योगदान समयमै र पूर्ण रूपमा उपलब्ध गराउनु अत्यन्त आवश्यक रहेको छ ।”
गुटेरेसज्यूको यो भनाइले राष्ट्रसङ्घमा देखिएको बजेट अभाव र त्यसका सम्भावित असरहरूप्रति गम्भीर ध्यानाकर्षण गराएको छ । उहाँले शान्ति स्थापनालाई उल्लेखनीय लागतमा उल्लेख्य प्रभाव पार्ने संयन्त्रको रूपमा व्याख्या गर्दै भन्नुभयो, “शान्ति स्थापनाका लागि छुट्याइएको बजेट विश्वव्यापी सैन्य खर्चको करिब आधा प्रतिशत मात्र हो । तर यसको प्रभाव अन्तर्राष्ट्रिय शान्ति र सुरक्षामा गहिरो र दीर्घकालीन हुन्छ ।”
सम्मेलनमा सहभागी अन्य विशिष्ट अतिथिहरूले पनि राष्ट्रसङ्घको शान्ति स्थापनामा विश्वास व्यक्त गर्नुभएको थियो । सम्मेलनको आयोजन जर्मनीका सम्माननीय विदेशमन्त्री योहान वाडेफुलले गर्नुभएको हो । उहाँले अमेरिकी सहयोग घट्ने सम्भावनाप्रति चिन्ता व्यक्त गर्दै भन्नुभयो, “संयुक्त राज्य अमेरिकाले दिएको योगदानको परिमाण यति महत्वपूर्ण छ कि त्यसको अभाव पूर्ति गर्न अन्य राष्ट्रहरूबाट मात्रै सम्भव छैन ।”
उहाँले यस विषयमा आफ्ना अमेरिकी समकक्षीसँग वार्ता गरेर वर्तमान नीतिमा पुनर्विचार गर्न आग्रह गर्ने प्रतिबद्धता व्यक्त गर्नुभयो । सम्मेलनमा जर्मनीका रक्षा मन्त्री बोरिस पिस्टोरियसज्यूले पनि उपस्थित भई शान्ति स्थापनाको महत्वमा जोड दिनुभयो । उहाँले भन्नुभयो, “शान्ति स्थापनालाई विश्व स्थिरताका लागि अनिवार्य उपायको रूपमा बुझ्न जरुरी छ ।”
दुई दिनसम्म सञ्चालन हुने यस मन्त्रीस्तरीय सम्मेलनमा १३० भन्दा बढी देशका प्रतिनिधिमण्डलहरूले सहभागिता जनाएका छन्, जसले राष्ट्रसङ्घीय शान्ति स्थापनाको भावी दिशा तय गर्न महत्वपूर्ण योगदान पु¥याउने अपेक्षा गरिएको छ ।
