काठमाडौँ, २१ पुसः इजरायली रक्षामन्त्री इजरायल काट्जले आइतबार लेबनानी समूह हिजबुल्लाहलाई युद्धविरामका सर्तहरू पूरा नगरेको आरोप लगाउनुभएको छ । उहाँले लडाकूहरूले सम्झौता उल्लङ्घन गरिरहे भने इजरायल ‘कारबाही गर्न बाध्य हुने’ चेतावनी दिनुभयो ।
काट्जले सेनाको उत्तरी कमान्डको भ्रमण गरेपछि यस्तो चेतावनी दिनुभएको हो । हिजबुल्लाह प्रमुख नइम कासिमले शनिबार इजरायलविरुद्ध यस्तै आरोप लगाउनुभएपछि यस्तो चेतावनी आएको हो । काट्जले युद्धविराम सम्झौतामा उल्लेख गरिएअनुसार हिजबुल्लाहले अझै पनि दक्षिणी लेबनानमा ‘लिटानी नदीपारि’ फिर्ता नभएको बताउनुभयो ।
“यदि यो शर्त पूरा भएन भने कुनै सम्झौता हुनेछैन र इजरायल उत्तरका बासिन्दाहरूको सुरक्षित घर फिर्तीको सुनिश्चितताका लागि आफैँ कारबाही गर्न बाध्य हुनेछ”, उहाँले भन्नुभयो ।
“अन्य प्रावधानहरू कार्यान्वयन गरिएका छैनन्, जस्तै सबै (हेजबुल्लाह) हतियारहरू ध्वस्त पार्नु र लेबनानी सेनाले यस क्षेत्रमा आतङ्कवादी पूर्वाधारहरूलाई विफल पार्नु”, काट्जले आफ्नो कार्यालयबाट जारी विज्ञप्तिमा भन्नुभयो, “हामी उत्तरी समुदाय र इजरायल राज्यका नागरिकहरूका लागि नयाँ खतरा सिर्जना गर्न दिनेछैनौँ” ।
कासिमले शनिबार इजरायलमाथि युद्धविराम उल्लङ्घन गरेको आरोप लगाउँदै समूह दक्षिणी लेबनानबाट इजरायललाई हट्नका लागि दिइएको ६० दिने समयसीमा समाप्त हुनुअघि नै जवाफी कारबाही गर्न तयार रहेको बताउनुभएको थियो ।
“हामीले इजरायली उल्लङ्घनहरू रोक्न र सम्झौता कार्यान्वयन गर्न अवसर दिइरहेका छौँ र हामी धैर्य प्रयोग गर्नेछौँ भनेर हामीले भनेका छौँ”, कासिमले भन्नुभयो ।
इजरायल र हिजबुल्लाहबीच दुई महिनाको पूर्ण युद्धपछि नोभेम्बर २७ मा लागू भएको नाजुक युद्धविराममा दुवै पक्षबाट उल्लङ्घनका आरोपहरू लगाइएको छ । युद्धविरामका सर्तहरू अन्तर्गत इजरायली सेनाले ६० दिनको अवधिमा फिर्ता हुँदा लेबनानी सेना दक्षिणमा संयुक्त राष्ट्रसङ्घका शान्तिरक्षकहरूसँग तैनाथ हुनुपर्नेछ । हिजबुल्लाहले सीमाबाट करिब ३० किलोमिटर (२० माइल) टाढा रहेको लिटानी नदीको उत्तरमा आफ्नो सेना फिर्ता लिनेछ र दक्षिणमा बाँकी रहेको कुनै पनि सैन्य पूर्वाधार विघटन गर्नुपर्नेछ ।
इजरायली, लेबनानी, फ्रान्सेली र अमेरिकी प्रतिनिधिहरू मिलेर बनेको एक समितिसँग संयुक्त राष्ट्र शान्तिसेना (युनिफिल) का प्रतिनिधिलाई कुनै पनि युद्धविराम उल्लङ्घनको पहिचान र व्यवहार सुनिश्चित गर्ने जिम्मेबारी दिइएको छ ।
संयुक्त राष्ट्रसङ्घको शान्ति सेनाले पनि इजरायललाई बारम्बार युद्धविरामको शर्त उल्लङ्घन गरेको आरोप लगाएको छ ।
