१५ कात्तिक, पाल्पा । गाउँ छाडेर युवा विदेशिने क्रम बढेको भए पनि रामपुरका विवेक गौतम भने आफ्नै खेतबारीमा श्रम गरेर समुज्ज्वल भविष्य निर्माणको अभियानमा हुनुहुन्छ ।
रामपुर नगरपालिका वडा नं ५ राङभाङ का २४ वर्षीय गौतमको बारीमा हुर्किएका साग-सब्जी देखेर जो-कोहीको मन लोभिन्छ । बाल्यावस्थादेखि नै खेती-किसानीमा माता-पितालाई साथ दिनुभएको उहाँ हाल व्यावसायिक रूपमा साग-सब्जी उमार्ने किसान बन्नुभएको छ । उहाँको मेहनत छ रोपनी जग्गामा लटरम्म काउली, गोलभेँडाले प्रस्तुत गरेका छन् ।
उहाँले छ रोपनी जग्गा मध्ये तीन रोपनी जग्गा भाडामा लिएर खेती गरिरहनुभएको छ । उहाँले पाँच वर्षअघि गौतम कृषि फर्म दर्ता गरी व्यवसाय सुरु गर्नुभएको हो । वार्षिक रूपमा रु छ लाख बराबरको आम्दानी गर्दै आएको उहाँ बताउनुहुन्छ । बेमौसमी खेतीलाई प्राथमिकता दिएर साग-सब्जी लगाउने गरेको उहाँले बताउनुभयो । “बजारको चिन्ता छैन, उत्पादन हुनुपर्छ, व्यापारी घरमै आउँछन्, आकर्षक आम्दानी हुनेरहेछ”, उहाँले भन्नुभयो ।
वैदेशिक रोजगारीमा पसिना बगाउन भन्दा आफ्नै गाउँको माटोमा पसिना बगाएर भविष्य बनाउने सोचका साथ खेती थालनी गरेको उहाँले जनाउनुभयो । उहाँले ‘टनेल’भित्र र बाहिर खेती गर्नुभएको छ । टनेलभित्र उत्पादन धेरै हुने गरेको उहाँले सुनाउनुभयो ।
युवालाई प्रोत्साहन गर्दै यस व्यवसायका लागि रामपुर नगरपालिकाले ब्याज अनुदान कार्यक्रममा समावेश गरी दुई वर्षसम्मका लागि रु आठ लाख रकम ब्याज अनुदान उपलब्ध गराएको उहाँ बताउनुहुन्छ । सबैको साथ र हौसला पाएकाले उहाँ खेती विस्तार गर्न उत्साहित हुनुहुन्छ ।
