बारा, १५ भदौ : पूर्वराष्ट्रपति विद्या भण्डारीले आफूले एमालेको सदस्यता नवीकरण गरिसकेको विषय दोहोर्याएकी छिन् । मदन भण्डारी फाउन्डेसन बारा जिल्ला कमिटीले मदन भण्डारीको ७५औं जन्मजयन्तीको अवसरमा आइतबार कलैयामा आयोजना गरेको भेटघाट कार्यक्रमलाई सम्बोधन गर्दै भण्डारीले उक्त कुरा दोहोर्याएकी हुन् ।
एमालेले मदन भण्डारीलाई जननेताका रूपमा स्वीकार गरिसकेको उनले बताइन् । मदन भण्डारीको मार्गदर्शन सिद्धान्तमै एमाले अघि बढेको उनले बताइन् । मदन भण्डारीको दासढुंगामा रहस्यमय निधन भएको भन्दै मार्गदर्शन सिद्धान्त पालना गर्नु पार्टी, नेता र कार्यकर्ताको पकर्तव्य रहेको उनले बताइन् ।
उनी सहभागी कार्यक्रममा एमाले पोलिटब्युरो सदस्य पुरुषोत्तम पौडेलबाहेक पार्टीका जिल्लाका नेता–कार्यकर्ताको पार्टीको हैसियतमा सहभागिता थिएन । पार्टीको झण्डा पनि थिएन ।
‘तपाईँहरू पार्टीको सदस्य हुनु / नहुनु तर जननेता मदन भण्डारीको मार्गदर्शन सिद्धान्तमा निरन्तर काम गर्नू,’ पूर्वराष्ट्रपति भण्डारीले भनिन्, ‘७७ वटै जिल्लामा मदन भण्डारीको जन्मजयन्ती कार्यक्रम गरी मनाउने योजना छ । यो कार्यक्रम मेरा लागि सरप्राइज हो । त्यसैले आयोजकलाई विशेष धन्यवाद छ ।’
तराईमा वातावरणले जनजीवनमा असर गरेको उनले बताइन् । कहिले सुख्खा, कहिले बाढी त कहिले चुरे विनाशले संकट निम्त्याएको उनले बताइन् ।
