भारदह (सप्तरी), भदौ १५ : पूर्व उपप्रधानमन्त्री एवं जनता समाजवादी पार्टी (जसपा) नेपालका अध्यक्ष उपेन्द्र यादवले मधेसी जनतालाई राज्यले न्याय गर्न नसकेको टिप्पणी गर्नुभएको छ ।
जसपा नेपालले राजविराजमा आइतबार आयोजना गरेको राजविराज नगर समितिको नवनिर्वाचित पदधिकारी तथा कार्यसमितको शपथ ग्रहण तथा पदस्थापन कार्यक्रममा उहाँले त्यस्तो टिप्पणी गर्नुभयो ।
उहाँले मधेसी जनताको विकास, प्रतिनिधित्व र पहिचानका लागि राज्यले उपेक्षा गर्दैआएको बताउनुभयो । उहाँले भन्नुभयो, “मधेस आन्दोलनपछि महिला, गरिब, मुस्लिम, थारू पहाडका आदिवासी जनजातिका लागि कोटा छुट्याए पनि जनसंख्याको आधारमा मधेस र मधेसीले अधिकार पाउन सकेको छैन् ।”
लोकतन्त्रमा जनसंख्याको आधारमा प्रतिनिधित्व हुनुपर्ने भए पनि मधेसीले जनसंख्याको आधारमा कर्मचारी, संसदलगायत कुनै क्षेत्रमा प्रतिनिधित्व गर्न नसकेको बताउनुभयो ।
निर्णायक भूमिकामा मधेसीहरू नपुगेसम्म मधेसको चौतर्फी विकास सम्भव नहुने उहाँले बताउनुभयो । उहाँले भन्नुभयो, “नेपालको विकासको लागि संसारका धेरै देशबाट सहयोग निरन्तर आए पनि हाम्रो देशको विकास हुन सकेको छैन् ।”
जसपा सप्तरीको जिल्ला अध्यक्ष केदार यादवको अध्यक्षतामा आयोजित कार्यक्रममा जसपा केन्द्रीय तथा मधेश प्रदेशसभा सदस्य किरण साह, मधेस प्रदेशका पूर्व उपसभामुख उपमा देव, शैलेन्द्र मोहन झा, डा. बबीसिंह यादव, रमिला साह लगायतले धारणा राख्नुभएको थियोे ।
– सुधा देव
