काठमाडौँ, भदौ १३ : देशकै पहिलो आधुनिक नागढुङ्गा–सिस्नेखोला सुरुङमार्ग निर्माण अन्तिम चरणमा रहेको र निकट भविष्यमै सञ्चालन गर्ने तयारी भइरहेको छ ।
सडक विभागका प्रवक्ता प्रभातकुमार झाले नागढुङ्गा–सिस्नेखोला सुरुङमार्ग आयोजनाको सम्पूर्ण निर्माण असोजभित्रै सम्पन्न गरिने बताउनुभयो । अहिलेसम्म आयोजनाको भौतिक प्रगति ९४.५ प्रतिशत छ ।
प्रवक्ता झाले सुरुङमार्ग सञ्चालनका लागि मन्त्रीपरिषद्बाट उपभोग दस्तुरसमेत स्वीकृत भइसकेको जानकारी दिनुभयो । आगामी दिनमा सो सुरुङको मर्मतसम्भार तथा सञ्चालनका लागि आवश्यक स्रोतको दिगो व्यवस्थापन गर्ने उद्देश्यसहित उपभोग दस्तुर लिने निर्णय गरिएको उहाँको भनाइ छ । साउन २६ गते बसेको मन्त्रीपरिषद्को बैठकले उपभोग दस्तुर लिने प्रस्तावलाई स्वीकृत गरेको थियो ।
सुरुङमार्ग सञ्चालन, व्यवस्थापन तथा मर्मतका लागि सेवाप्रदायक परिचालन गर्न सेवा खरिद कार्यको तयारी भइरहेको बताउँदै उहाँले सेवाप्रदायक खरिद कार्यका लागि अर्थ मन्त्रालयबाट स्रोत सहमति प्राप्त भएको छ भने सेवा खरिद प्रक्रियाका लागि आवश्यक खरिद निर्देशिका मन्त्रीपरिषद्बाट स्वीकृत भइसकेको जानकारी दिनुभयो ।
सुरुङमार्ग प्रयोगकर्ताबाट उपभोग दस्तुर सङ्कलनका लागि ‘आरएफआइडी बेस्ड टल कलेक्सन’ प्रणाली लागु गर्ने निर्णय भएको र उक्त प्रणाली जडान भइरहेको जानकारी दिनुभयो । यस प्रणालीको प्रयोगबाट सवारीसाधनको विन्डसिल्डमा टाँसिने बैङ्क खाता आबद्ध भएको आरएफआइडी ट्र्यागमार्फत सोझै टोल भुक्तानी गर्न सकिने छ ।
सुरुङमार्ग सञ्चालन, व्यवस्थापन तथा मर्मतका लागि चौबिसै घण्टा सेवा प्रदान गर्नुपर्ने, आपतकालीन अवस्थामा उद्धार कार्य, आगलागी भएको अवस्थामा आगो नियन्त्रण तथा सुरुङमार्गमा जडान भएका पावर सप्लाई, लाइटिङ, भेन्टिलेसन, इन्टरनल कम्युनिकेसन, रिमोट मोनिटरिङ, फायर फाइटिङ, आपतकालीन सुविधा लगायतका उच्च प्रविधियुक्त प्रणालीको नियमित सञ्चालन, अनुगमन तथा मर्मतसम्भार गर्न जापानको परामर्शदाताबाट ‘स्पेसिफिकेसन’ र ‘म्यानुअल्स’ तयार भई स्वीकृत भइसकेको उहाँले जानकारी दिनुभयो ।
