२२ चैत, काठमाडौँ : रास्वपा सभापति रवि लामिछानेले प्रहरीमा गिरफ्तारी दिन लागेको दाबी गरेका छन् । उच्च अदालत तुलसीपुरको बुटवल इजलासले सहकारी ठगी र संगठित अपराधमा लामिछानेलाई पुर्पक्षका लागि थुनामा पठाउन आदेश दिएको थियो ।
लामिछानेलाई पक्राउ गर्न काठमाडौं प्रहरी परिसरबाट प्रहरी उनको घरमा पुगिसकेको छ । प्रहरी आफ्नो घरमा आइसकेपछि लामिछानेले भने गिरफ्तारी दिन लागेको सामाजिक संजाल फेसबुकमा लेखेका छन् ।
‘सम्मानित अदालतको आदेशको सम्मान गर्दै म आफै आजै, अहिले नै गिरफ्तारी दिँदैछु । साथै न्यायालयका अन्य ढोकाहरू मेरा लागि खुल्ला होलान् नै । न्यायका लागि दुनियाँका सबै ढोका ढकढकाउँछु,’ लामिछानेले लेखेका छन् । आफूमाथि अन्याय भएको पनि लामिछानेले लेखेका छन् । ‘ममाथि ठूलो अन्याय भएको छ,’ लामिछानेले भनेका छन् । उनले पार्टीको शनिबार आयोजना हुन लागेको चितवनको कार्यक्रम नरोक्न पनि आग्रह गरेका छन् ।
रवि लामिछानेलाई पक्राउ गर्नका लागि शुक्रबार साँझ प्रहरी घरमै पुगेको छ । उच्च अदालत तुलसीपुरको बुटवल इजलासले सहकारी ठगीमा लामिछानेलाई पुर्पक्षका लागि थुनामा पठाउन आदेश जारी गरेसँगै लामिछानेलाई पक्राउ गर्न प्रहरी पुगेको हो ।काठमाडौं प्रहरी परिसरका प्रवक्ता अपील बोहोराका अनुसार लामिछानेलाई पक्राउ गर्न प्रहरी उनको घरमा पुगको छ । उच्च अदालतको आदेश आएसँगै लामिछानेलाई पक्राउ गर्न लागिएको हो ।
उच्च अदालतको आदेश आएसँगै लामिछानेलाई पक्राउ गरेर रुपन्देही पठाउने तयारी काठमाडौं प्रहरीले गरेको छ । उच्च अदालत तुलसीपुरको बुटवल इजलासले बुटवलको सुप्रिम सहकारी ठगी र संगठित अपराधसम्बन्धी कसुरमा लामिछानेलाई पूर्पक्षका लागि थुनामा पठाउने आदेश गरेको थियो ।
उच्च अदालत तुलसीपुर, बुटवल इजलासका न्यायाधीशद्वय रमेश ढकाल र स्वीकृति पराजुलीको इजलासले लामिछानेलाई धरौटीमा छाड्ने जिल्ला अदालत रुपन्देहीको आदेश बदर गरेको थियो । योसँगै गोरखा मिडिया नेटवर्कका तत्कालीन सञ्चालक छविलाल जोशीलाई थुनामा पठाउने जिल्ला अदालतको आदेश पनि उच्चले सदर गरेको उच्च अदालत तुलसीपुर, बुटवल इजलासका उपरजिस्ट्रार हरिगोपाल ज्ञवालीले जानकारी दिए ।
