काठमाडौँ, ३ माघ : टिकटकले अमेरिकामा आफ्नो सञ्चालन बन्द गर्ने तयारी गरेको छ । जनवरी १९ सम्मको समयसीमा सकिने भएपछि टिकटकले यही आइतबारदेखि अमेरिकामा टिकटक उपलब्ध नहुने बनाउन लागेको रोयटर्सले जनाएको छ । योसँगै अमेरिकाका १७ करोड टिकटक प्रयोगकर्ताले एप चलाउन पाउने छैनन् ।
सोमबार ह्वाइट हाउस प्रवेशसँगै राष्ट्रपतिमा निर्वाचित डोनाल्ड ट्रम्पले दोस्रो कार्यकाल सुरु गर्नुअघि नै अमेरिकामा टिकटक बन्द हुन लागेको हो । वासिङ्टन पोस्टका अनुसार ट्रम्पले भने टिकटकमाथि प्रतिबन्ध लगाउने मिति जनवरी १९ मा नभएर त्योभन्दा ६० देखि ९० दिन पर धकेल्ने गरी कार्यकारी आदेश जारी गर्ने तयारी गरेका छन् । तथापि, उनले कानुनी रूपमा कसरी त्यस्तो आदेश जारी गर्न सक्छन् भन्नेमा प्रश्न छ ।
टिकटकको योजनाबारे जानकार स्रोतलाई उद्धृत गर्दै एनबीसी न्युजले पनि आइतबारबाटै कम्पनीले सञ्चालन रोक्ने तयारी गरेको जनाएको छ । राष्ट्रपति जो बाइडेनले गत अप्रिलमा हस्ताक्षर गरेको कानुनमा टिकटकको अमेरिकी सञ्चालन कम्पनीले कि त गैर चिनियाँ उद्यमीलाई बिक्री गर्नुपर्ने नभए प्रतिबन्ध लगाइने व्यवस्था छ । यसका लागि अमेरिकी सरकारले टिकटकको प्यारेन्ट कम्पनी बाइटडान्सलाई जनवरी १९ सम्मको समय सीमा दिएको थियो ।
बाइटडान्सले भने सो कानुनले अभिव्यक्ति स्वतन्त्रता उल्लङ्घन गर्नुका साथै व्यवसायमा समान अवसर नदिएको लगायत आरोप लगाएर सर्वोच्च अदालतमा मुद्दा दायर गरेको छ । मुद्दाको सुनुवाइका क्रममा अमेरिकी प्रयोगकर्ताको डेटा सङ्कलन गरेर टिकटकले चिनियाँ सरकारलाई दिने अमेरिकी सरकारको आशङ्काप्रति न्यायाधीशहरूले बढी जोड दिएका थिए । यसले पनि प्रतिबन्ध लगाउन सक्ने कानुन उल्ट्याउने बाइटडान्सको चाहना पूरा नहुने सङ्केत देखिएको छ ।
अमेरिकामा इलन मस्कदेखि युट्युबर मिस्टर बिस्ट, शार्क ट्यांक अमेरिकाका लगानीकर्ता केभिन ओलियरी, अर्बपति फ्र्याङ्क म्याककर्टजस्ता प्रख्यात अर्बपतिहरूले टिकटकको अमेरिकी स्वामित्व खरिद गर्न चाहेको खबर बाहिरिएका छन् । टिकटकले भने सर्वोच्चको फैसला कुर्ने र त्यो आफ्नो पक्षमा आएन भने अमेरिकी स्वामित्व बिक्री गर्नुभन्दा सेवा नै बन्द गरेर हिँड्ने प्रतिक्रिया दिएको एनबीसी न्युजले जनाएको छ ।
