अन्तर्राष्ट्रिय चलखेल रोक्न तोकिएकै मितिमा चुनाव हुनुपर्छ : वर्षमान पुन

काठमाडौँ, पुस २६ : नेपाली कम्युनिस्ट पार्टीका नेता एवं पूर्व अर्थमन्त्री वर्षमान पुनले तोकिएकै मिति आगामी २१ फागुनमा निर्वाचन हुनुपर्ने बताएका छन् ।

शनिबार काठमाडौंमा आयोजित एक कार्यक्रमलाई सम्बोधन गर्दै पुनले तोकिएकै मितिमा निर्वाचन सम्पन्न गर्नुको विकल्प नरहेको बताए । हजारौंको बलिदानीबाट प्राप्त राजनीतिक उपलब्धि संकटमा रहेकाले मुलुकको निकास निर्वाचनबाट मात्र सम्भव हुने उनको भनाइ थियो ।

पुनले अन्तर्राष्ट्रिय चलखेल र मुलुकको अस्तित्व नामेट पार्न खोज्ने प्रवृत्तिलाई निस्तेज पार्न देशलाई माया गर्ने राष्ट्रियता पक्षधर शक्तिहरुबीच एकता र सहकार्य जरुरी रहेकामा जोड दिए । ‘हजारौंको बलिदानीपछि प्राप्त उपलब्धि खतरामा छ । यस्तो अवस्थामा निर्वाचनले मात्र मुलुकलाई निकास दिन सक्छ । अन्तर्राष्ट्रिय चलखेल र देशको अस्तित्व नै नामेट गर्न खोज्ने प्रवृत्तिविरुद्ध राष्ट्रिय अस्मिता, अखण्डताका पक्षधर देशभक्त शक्तिहरु एक ठाउँमा उभिनुपर्छ’, पुनले भने ।

मुलुकको राजनीति अत्यन्तै अस्थिर र तरल अवस्थामा रहेको र कहाँ पुगेर स्थिरता कायम हुन्छ भन्ने अनुमान गर्न कठिन रहेको पुनले औंल्याए । ‘अहिले राष्ट्रिय राजनीतिमा अस्थिर, तरल र अनिश्चियजस्तो वातावरण छ । कहाँ पुगेर स्थिरता प्राप्त गर्छ भन्न नसकिने अवस्था छ’, उनले भने ।

पुनले राजनीति सँगै अर्थतन्त्रमा पनि समस्या चुलिएको बताए । ०७२ को महाभूकम्प र कोभिड–१९ महाकारीबाट प्रभावित अर्थतन्त्र तङ्ग्रिन खोज्दै गर्दा भदौ २३ र २४ को जेन–जी आन्दोलनपछि फेरि सुस्ततामा गएको उल्लेख गरे । आन्दोलनका क्रममा भएको विध्वंसका कारण निजी क्षेत्रको मनोबल गिरेको उनको भनाइ थियो ।

‘भूकम्प र कोभिड–१९ को प्रभावबाट अर्थतन्त्र तङ्ग्रिन खोजिराखेका बेला भदौ महिनामा भएको जेन–जी आन्दोलनका क्रममा भएका विध्वंसहरूले लगानीकर्ताहरुको मनोबल गिरिराखेको अवस्था छ । तङ्ग्रिँदै गएको अर्थतन्त्र फेरि सुस्ताएको छ’, पूर्वअर्थमन्त्रीसमेत रहेका पुनले भने ।

फरक प्रसंगमा उनले पुस्तापुस्ताबीच विभाजन ल्याउने राजनीतिले मुलुकको हित नगर्ने स्पष्ट गरे ।

‘नयाँ र पुरानो भनेर हुँदैन । जेन–जी भनेको पुस्ता हो । त्यो पनि एक दिन पुरानो हुन्छ । मुलुक बनाउने हो भने पुस्ताका बीचमा द्वन्द्व होइन । अन्तरघुलन हुनुपर्छ’, उनले भने, ‘पुरानो पुस्ताको अनुभव, बीचको पुस्ताको सन्तुलन र नयाँको जोस जाँगर मिलाएर मुलुक, समाज र पार्टीहरु अगाडि जानुपर्ने हुन्छ ।’

अर्को एक फरक प्रसंगमा उनले विश्व राजनीतिमा नियमवद्ध विश्वव्यवस्था र विचारधारात्मक खेमाबन्दीको नियम तोडिएकाले संसारभर अस्थिरता उत्पन्न भएको तर्क गरे ।

‘पहिला नियमवद्ध विश्वव्यवस्था वा आईडोलीजीकल रूपले खेमाबन्दी हुने विश्वव्यवस्था भनिन्थ्यो । पुँजीवादी देशहरू एकातिर र समाजवादी देशहरू अर्कोतिर विचारधारात्मक रूपले खेमाबन्दी हुन्थ्यो । तर, अहिले के भयो भने विश्वमा कुनै नियम छैन । ठूला र शक्तिशाली देशहरुले जे भन्यो त्यही नै नियम हुनेजस्तो अवस्था छ । वैचारिक रूपले पुँजीवादी बाटो अँगालेका देहशरुका बीचमा पनि मारामार छ ।

समाजवादी या समाजवाद उन्मुद देशहरुका बीचमा पनि सहकार्य छैन । यस प्रकारले भन्दा विश्व न विचारधाराले चलेको छ न कुनै विश्वसंस्थाहरुको नियमले चलेको छ । न विश्वव्यापी आपसी सम्झौताबाट चलेको छ’, पुनले भने, ‘ठूला देशहरू सम्झौताबाट पछि हट्ने प्रवृत्ति रहँदा विश्व राजनीतिमै अस्थिरता छ । विश्वव्यापी राजनीतिक अस्थिरता र नियमविहीनताले विश्वव्यापी आर्थिक मन्दीको खतरा छ ।’

सूचना प्रविधि र यातायातको सुगमताका कारणले विश्व नै सानो गाउँमा परिणत भएको चर्चा गर्दै उनले संसारको एउटा कुनामा हुने घटनाबाट अर्को कुनामा रहेको देशको राजनीति र अर्थतन्त्र प्रभावित हुने अवस्था विद्यमान रहेको औंल्याए ।