महामन्त्रीद्वय जिम्मेवार भएकाले पार्टी निर्णय विपरित चल्न मिल्दैन : कांग्रेस नेता साउद

काठमाडौँ, पुस २२ गते । नेपाली कांग्रेसका नेता नारायणप्रकाश साउदले वैशाखमा पार्टीको नियमित महाधिवेशन सम्पन्न गर्ने पार्टीको निर्णय कार्यान्वयन गर्ने जिम्मेवारी पार्टीका महामन्त्रीद्वय गगन थापा र विश्वप्रकाश शर्माको रहेको बताउनुभएको छ ।

महामन्त्रीद्वय थापा र शर्माले विशेष महाधिवेशन गरेर अघि बढ्ने गरी गतिविधिलाई तीव्रतासाथ अघि बढाएपछि संस्थापन पक्षका नेता साउदले यस्तो टिप्पणी गर्नुभएको हो ।

मंगलबार पार्टी मुख्यालय सानेपामा सञ्चारकर्मीहरुले राखेका जिज्ञासाको जवाफ दिने क्रममा उहाँले केन्द्रीय कार्य सम्पादन समिति बैठकले वैशाखमा पार्टीको १५ औँ महाधिवेशन गर्ने निर्णय गरेकाले सो निर्णयलाई कार्यान्वयनमा लैजाने मुख्य जिम्मेवारी महामन्त्रीद्वयको भएको बताउनुभयो ।

महामन्त्रीद्वय दायित्वबाट पछि हटन नमिल्ने दाबी उहाँको छ । नेता साउदले पार्टीको विशेष महाधिवेशनको औचित्य नभएको पनि दोहोर्‍याउनु भयो ।

उहाँले भन्नुभयो,  ‘विशेष अधिवेशनको औचित्य छैन भनेर केन्द्रीय कार्य सम्पादन समितिको बैठकले निर्णय गरिसकेको अवस्था छ । यसको सँगसँगै हामीले १५ औँ महाधिवेशनको कार्यतालिकाको विषयमा पनि केही संशोधन गरेर बैशाखमा गर्ने निर्णय गरिसकेका छौँ । त्यो केन्द्रिय कार्य सम्पादन समितिको निर्णय हो । हाम्रो महामन्त्रीजी पनि जिम्मेवारीमा हुनुहुन्छ । उहाँहरुले आफ्नो जिम्मेवारी अनुकूल केन्द्रीय कार्य सम्पादन समितिको निर्णयलाई कार्यान्वयन गर्ने कार्यभार पूरा गर्नेछन भन्ने विश्वास लिएको छु ।’

नेता साउदले निर्वाचनको तयारीमा जानुपर्ने भएकाले पनि विशेष महाधिवेशनमा जाने कुराको कुनै अर्थ नहुने समेत बताउनुभयो ।