रास्वपा बैठकमा आज बालेन-कुलमान नबस्ने

काठमाडौँ, पुस २० गते। राष्ट्रिय स्वतन्त्र पार्टी (रास्वपा) र उज्यालो नेपाल पार्टी (उनेपा) बीच एकता लगत्तै उत्पन्न भएको असमझदारी समाधानउन्मूख बनेको छ ।

रास्वपा सभापति रवि लामिछाने, उपसभापति कुलमान घिसिङ र वरिष्ठ नेता बालेन्द्र साहबीचको छलफल तथा तीनै पक्षका नेताहरू सम्मिलित अनौपचारिक कार्यदलको बैठकबाट विवाद समाधानको सूत्र पहिल्याइएको हो ।

हतारमा गरिएको एकतापश्चात समानुपातिकको बन्द सूचीदेखि प्रत्यक्ष निर्वाचन र केन्द्रीय कमिटीमा पाउने हिस्सा लगायतका विषयमा कुलमान असन्तुष्ट बनेका थिए ।

विवाद समाधानका लागि हिजो रवि, बालेन र कुलमानबीच भएको छलफल सकारात्मक भएको बुझिएको छ । रास्वपा र उज्यालो नेपाल दुवैतर्फका स्रोतहरूले यसको पुष्टि गरेका छन् । तीनै पक्षका नेताहरू सम्मिलित अनौपचारिक कार्यदलको बैठकले पार्टी समायोजनका विषयमा सहमतिको प्रस्ताव तयार गरेको छ ।

कार्यदलमा रहेका उज्यालो नेपालका एक नेताले करिब-करिब सबै विषयमा सहमति जुटेको बताए । पार्टीको केन्द्रीय समितिदेखि तल्लो तहसम्म समायोजनको खाका बनिसकेको उनको भनाइ छ ।

ती नेताको दाबी अनुसार समानुपातिक उम्मेदवारको बन्द सूचीमा उज्यालो नेपालका थप ४ जना समावेश गर्ने कार्यदलमा सहमति भएको छ ।

प्रत्यक्ष निर्वाचनतर्फ पनि उज्यालो नेपालले आफूहरूको हिस्सेदारी सुनिश्चित गर्न माग गरेको छ । कार्यदलको बैठकमा अब एउटै पार्टी भइसकेकाले कसैलाई काखा र कसैलाई पाखा नगरीकन जित्ने उम्मेदवारको खोजी गर्ने समझदारी बनेको बुझिएको छ ।

स्रोतका अनुसार कार्यदलमा उज्यालो नेपालले रास्वपाको सबै संरचनामा ३० प्रतिशत हिस्सा माग गरेको थियो । रास्वपाको केन्द्रीय कमिटीमा कम्तीमा १५ जना उज्यालो नेपालबाट समेट्ने सहमति कार्यदलमा जुटेको दाबी गरिएको छ ।

आज रास्वपाको सचिवालय बैठक र त्यसपछि केन्द्रीय समिति बैठकमा कार्यदलले जुटाएको सहमतिबारे छलफल हुने छ । आजको बैठकमा बालेन र कुलमान भने सहभागी हुने छैनन् ।

एकताको सहमति भइसके पनि बालेन र कुलमानलाई औपचारिक कार्यक्रम गरेर पार्टीमा स्वागत गरिएको छैन । दुवै नेताहरू अहिलेसम्म रास्वपा कार्यालय गएका छैनन् । सैद्धान्तिक विषयमा पनि कार्यदलले सहमति जुटाएको रास्वपा नेताहरूको भनाइ छ ।