भोजपुर, भदौ १५ : गाउँघरका खोला खोल्सीमा पाउने निगुरो स्थानीयको आम्दानीको स्रोत बनेको छ । सडकको पहुँच विस्तार भएपछि यहाँका स्थानीयले निगुरो बिक्रीबाट आम्दानी गर्न थालेका हुन् ।
दुर्गम क्षेत्रको खोला खोल्सी तथा नवपाखामा पाइने निगुरो ठूला सहरहरूमा पुग्न थालेको छ । टेम्केमैयुङ–५ चोलन्ती, मझौले गाउँका स्थानीयले वनजंगलबाट संकलन गरेको निगुरो धरान, इटहरी, विराटनगर, झापा, काठमाडौँलगायत सहरमा जाने गरेको टेम्केमैयुङ–५ का स्थानीय डम्बरबहादुर विष्टले बताए। विगतमा त्यत्तिकै वन पाखा, खोला खोल्सीमा खेर गइरहेका निगुरोले अहिले गाउँघरमा नै राम्रो मूल्य पाउने गरेको उनको भनाइ छ । निगुरो लिनका लागि ठेकेदार गाडी लिएर नै गाउँघरमा पुग्ने गरेका छन् ।
“यहाँका नवपाखामा पाइने निगुरो बिक्री हुन थालेको छ”, उनले भने, “सडक विस्तार भएपछि बेचबिखन गर्न सहज छ । बर्सेनि यो याममा संकलन गरेर बिक्री गर्दै आएका छौँ । निगुरो बिक्रीबाट घर खर्च चलाउन सहज छ ।
संकलन गरिएको निगुरो प्रतिकेजी रु. ४० सम्ममा घरबाट नै ठेकेदारले लैजाने गरेका छन् । पात भएको भन्दा डाँठमात्र भएको निगुरोले राम्रो मूल्य पाउने स्थानीय लालबहादुर विष्टले बताए । निगुरो बिक्रीबाट परिवारको घर खर्च धान्न सहज भएको उनले जानकारी दिए । एक जनाले एक दिनमा एकदेखि दुई डोकोसम्म निगुरो संकलन गर्ने उनको भनाइ छ ।
“खोला खोल्सीको निगुरो सहर बजारमा जान थालेको छ”, उनले भने, “निगुरो हुर्किएपछि गाईबस्तुलाई सोतरका रूपमा प्रयोग गर्दै आएका थियौँ । अहिले त्यही निगुरोले मूल्य पाएको अवस्था छ । संकलित निगुरो बिक्रीका लागि कुनै समस्या छैन ।”
उनीउ प्रजातिमा पर्ने निगुरो पहाड र तराई सबैतिरका वनजंगल तथा खोला खोल्सीमा पाइने वनस्पति हो । निगुरो पहाडी क्षेत्रमा बढी मात्रामा पाइने भए पनि यहाँका गाउँघरका स्थानीयले भने कमैले मात्र खाने गरेका छन् । स्थानीयवासीले बर्खायाम सुरु भएपश्चात् जेठ-असारबाट कात्तिक महिनासम्म निगुरो बेच्दै आएका छन् ।
वनजंगलमा सजिलै पाइने, निगुरो अग्र्यानिक हुने भएकाले सहरका मानिसको रोजाइमा पर्ने गरेको छ । तराईमा पाइने निगुरोभन्दा पहाडी क्षेत्रबाट जाने डाँठे निगुरोको बजारमा राम्रो माग छ ।
