दाङ, भदौ १५ : देउखुरी उपत्यकासहित कपिलवस्तु र रुपन्देहीका थारू समुदायले आज अट्वारी पर्व मनाउँदै छन । गत भदौ ८ गते न मनाएका थारू समुदायले आज अट्वारी मनाउन लागेका हुन् । यसअघि दाङ उपत्यकासहित, बाँके, बर्दिया, कैलाली, कञ्चनपुर र सुर्खेतका थारू समुदायले भदौ ८ गते अट्वारी मनाएका थिए तर, देउखुरीसहित कपिलवस्तु र रुपन्देहीका थारू समुदायले तिजपछिको आइतबारलाई अट्वारी मनाउने चलन भएकोले आज अट्वारी पर्व मनाउन लागिएको लमही नगरपालिकाका नगरप्रमुख जोगराज चौधरीले बताउनुभयो ।
आफुहरुले तीजपछिको आइतबार अट्वारी मनाउने भएकोले आज र भोलि अट्वारीको सार्वजनिक विदा दिएको उहाँले बताउनुभयो । हामीले पहिलादेखि तिजपछिको अट्वारी मनाउदै आएका छौ, उहाँले भन्नुभयो, “त्यहि आधारमा आज हामीले अट्वारी मनाउन लागेका छौं ।” नगरप्रमुख चौधरीले लमही नगरपालिकामा भदौ १५ र १६ गते सार्वजनिक विदा दिएको जानकारी दिनुभयो ।
यस्तै देउखुरी क्षेत्रकै राप्ती गाउँपालिका र गढवा गाउँपालिकाले पनि भदौ १५ गते सार्वजनिक विदा दिएको छ । त्यसैगरी कपिलवस्तु र रुपन्देहीका स्थानीय तहले पनि आज अट्वारी पर्वको अवसरमा सार्वजनिक विदा दिएका छन् । यद्यपि लुम्बिनी प्रदेश र सुदूरपश्चिम प्रदेश सरकारले भने यसअघि भदौ ८ गते नै अट्वारी पर्वको सार्वजनिक विदा दिएको थियो ।
हरेक वर्ष कृष्णजन्माअष्टी (थारू समुदायका महिलाले मनाउने अष्टिम्की) को दोस्रो आइतबार अर्थात कुशे औँसीको पहिलो आइतबारको दिन अधिकांश थारू समुदायले अट्वारी पर्व मनाउँदै आएका छन् । तर, देउखुरी क्षेत्र सहित कपिलवस्तु र रुपन्देहीका थारू समुदायले भने तीजपछिको आइतबारलाई अट्वारी मनाउने गरेका छन् । अट्वारी पर्वको जानकार समेत रहेका थारु अगुवा छविलाल कोपिलाले अट्वारी पर्व तिज पर्वसंग कुनै साइनो नरहेको बताउनुभयो । उहाँले अट्वारी पर्व भनेको कृष्णजन्माअष्टमी पछिको दोस्रो आइतबार अर्थात कुशे औंसीको पहिलो आइतबार थारू समुदायले अट्वारी पर्व मनाउने प्रचलन रहदैआएको बताउनुभयो ।
