पोखरा, ७ भाद्र: सूचना प्रविधि (आईटी) को बढ्दो महत्व र त्यसले सिर्जना गरेको रोजगारीका असीमित सम्भावनालाई मध्यनजर गर्दै पोखरा र काठमाडौमा ‘अजेयङ्क्या एडमिसन फेयर नेपाल २०२५’ सँगै एआई/एमएल/एआर/भीआर/सीएस कार्यशाला’ हुने भएको छ।
पोखरा इभेन्ट सेन्टर, बुलौदीमा भदौ १७ र १८ गते पोखरामा र दियो महलमा भदौ २० र २१ गते काठमाडौमा हुने यस फेयरले विद्यार्थीहरूलाई अत्याधुनिक प्रविधिबारे निःशुल्क प्रशिक्षण दिने र उच्च शिक्षाका लागि नयाँ अवसरहरूको ढोका खोल्ने लक्ष्य राखेको छ। दिप आईटी एण्ड एजुकेसनल कन्सल्टेन्सी, दिप कम्प्युटर इन्स्टिच्युट र क्यापिटल एजुकेशन एण्ड माइग्रेसनको संयुक्त आयोजनामा भएको यो कार्यक्रमलाई अजेङ्क्या डीवाई पाटिल युनिभर्सिटी र भेलोसेस कन्सल्टिङ सर्भिसेस (भारत) ले प्रायोजन गरेका छन् भने विश्वविख्यात कम्पनी माइक्रोसफ्टसँगको सहकार्यमा कार्यक्रम हुने शुक्रबार आयोजकले पोखरामा पत्रकार सम्मेलन आयोजना गरेर जानकारी दिएका छन्।
विश्व आर्थिक मञ्चको ‘फ्युचर अफ् जब्स २०२३’ प्रतिवेदन अनुसार, प्रविधिको प्रयोगले अन्य पेशामा रोजगारी घट्दै गएको परिप्रेक्ष्यमा आर्टिफिसिएल इन्टेलिजेन्स (एआइ), मेसिन लर्निङ (एमएल) विशेषज्ञ, सूचना सुरक्षा विश्लेषक र बिजनेस इन्टेलिजेन्स जस्ता प्रविधि–सम्बन्धित पेशाहरूमा तीव्र वृद्धि भइरहेको छ। सन् २०२७ सम्ममा विश्वभर करिब २३% रोजगारीमा प्रविधिले ठूलो परिवर्तन ल्याउने अनुमान गरिएको छ। यसैगरी, इन्टरनेसनल डेटा कर्पोरेसन (आईडीसी) को प्रक्षेपणअनुसार सन् २०२८ सम्ममा विश्वव्यापी एआईमा हुने खर्च ६३२ अर्ब अमेरिकी डलर पुग्नेछ र एआई पूर्वाधारको बजार पनि २०० अर्ब डलरभन्दा माथि पुग्नेछ। यस्तो विकाससँगै साइबर सुरक्षाको माग पनि ह्वात्तै बढेको छ।
इन्टरनेसनल इन्फर्मेसन सिस्टम सेक्युरिटी सर्टिफिकेशन कन्सोर्टियम (ISC2) को पछिल्लो अध्ययनले विश्वव्यापी साइबर सुरक्षा कार्यबल ५.५ मिलियन पुगे पनि ४.८ मिलियनको अभाव रहेको देखाएको छ, जसले दक्ष जनशक्तिको माग अझै बढेको संकेत गर्छ। यी तथ्याङ्कहरूले स्पष्ट पार्छ कि आजको आईटी, एआई/एमएल, एआर/भीआर र साइबर सुरक्षाको ज्ञानले विद्यार्थीहरूको भविष्य उज्ज्वल बनाउन सक्छ। यही आवश्यकतालाई मध्यनजर गर्दै यो कार्यशाला आयोजना गरिएको आयोजक दीप आईटी एण्ड एजुकेसनल कन्सल्टेन्सीका प्रमुख कार्यकारी अधिकृत दिनेश लामिछानेले जानकारी दिए ।
फेयरको मुख्य आकर्षण भनेको अन्तर्राष्ट्रियस्तरका विशेषज्ञहरूबाट प्रत्यक्ष प्रशिक्षण लिन पाउनु हो। माइक्रोसफ्ट, भेलोसेस कन्सल्टिङ र अजेङ्क्या डीवाई पाटिल युनिभर्सिटीका प्राध्यापक तथा विज्ञहरूले पोखरा र त्यसपछि काठमाडौंमा आएर विद्यार्थीहरूलाई प्रशिक्षण दिनेछन्। यसले नेपालकै विद्यार्थीहरूलाई अन्तर्राष्ट्रिय स्तरको अनुभव प्राप्त गर्ने अवसर प्रदान गर्ने आयोजको दावि छ। यस कार्यशालामा भर्चुअल रियालिटी (VR), अग्मेन्टेड रियालिटी (AR), आर्टिफिसियल इन्टेलिजेन्स (AI), मेसिन लर्निङ (ML) र साइबर सुरक्षा (CS) जस्ता अत्याधुनिक विषयहरूमा प्रशिक्षण दिइनेछ। यी विषयहरूमा हासिल गरिने ज्ञानले विद्यार्थीहरूको लागि आईटी, इन्जिनियरिङ, डेटा साइन्स, रोबोटिक्स, स्वास्थ्य प्रविधि, र फाइनान्स टेक्नोलोजी जस्ता क्षेत्रमा असीमित अवसरहरू खुल्ने आयोजकको भनाइ छ।
कार्यक्रम पूर्ण रूपमा निःशुल्क रहेको आयोजकले जानकारी दिएका छन्। +२ विज्ञान र व्यवस्थापन (कम्प्युटर) विषयका हालै उत्तीर्ण भएका र अघिल्लो वर्ष उत्तीर्ण भएका विद्यार्थीहरूले यसमा निःशुल्क सहभागिता जनाउन सक्नेछन्। लामिछानेका अनुसार, विद्यार्थीहरूलाई भविष्यमा प्रविधिमा आधारित विश्वस्तरीय शिक्षासँग जोड्ने र उनीहरूको करिअरलाई नयाँ दिशा दिनु नै यो कार्यक्रमको मुख्य लक्ष्य हो। यसैले सबै विद्यार्थीलाई सहज पहुँच होस् भनेर यसलाई निःशुल्क बनाइएको हो। पोखरामा दुई दिन चल्ने यो कार्यशाला त्यसपछि काठमाडौंमा भदौ २० र २१ गते दियो महलमा आयोजना हुनेछ।
दुवै शहरमा गरेर चार दिनसम्म चल्ने यस कार्यक्रममा हरेक दिन दुई सत्र सञ्चालन गरिनेछ: बिहान ७:३० देखि १:०० बजेसम्म र दिउँसो १:३० देखि ६:०० बजेसम्म। विद्यार्थीहरूले आफ्नो समय अनुकूल कुनै एक सत्र छनौट गर्न सक्नेछन्। हरेक ४० मिनेट लामो सत्रपछि १० मिनेटको मनोरञ्जनात्मक तथा विषयसँग सम्बन्धित खेलहरूको व्यवस्था गरिएको छ, जसले विद्यार्थीहरूलाई सिकाइमा थप ऊर्जाशील बनाउनेछ।
कार्यशालामा सहभागी हुने विद्यार्थीहरूका लागि छात्रवृत्ति र स्पट एडमिसनको पनि व्यवस्था गरिएको छ। अजेङ्क्या डीवाई पाटिल युनिभर्सिटीमा अध्ययन गर्न इच्छुक विद्यार्थीहरूले कार्यक्रम स्थलमै परामर्श लिएर तत्काल भर्ना गर्न सक्नेछन्। यस्तो स्पट एडमिसनमार्फत विद्यार्थीहरूले ३ लाख ५० हजार रुपैयाँसम्मको छात्रवृत्ति प्राप्त गर्ने अवसर पनि पाउनेछन्। आयोजकका अनुसार, यो छात्रवृत्तिले नेपाली आईटी कलेजको तुलनामा कम शुल्कमा अन्तर्राष्ट्रिय स्तरको इन्जिनियरिङ शिक्षा प्राप्त गर्न सहयोग पुग्नेछ।
“नेपाली कलेजहरुमा आईटी इन्जिनियरीङ्ग गर्ने सोचमा रहेका विद्यार्थीहरुको लागी यो एक विशेष अवसर हुन सक्छ, किनकी हामीले नेपाली कलेजको शुल्क भन्दा पनि कम शुल्कमा अन्तराष्ट्रिय डिग्रीका प्याकेज यस कार्यक्रममा ल्याएका छौ” लामिछानेले वताए । कार्यक्रममा दैनिक करिब ४०० जना विद्यार्थीको सहभागिता हुने अपेक्षा गरिएको छ। यसरी पोखरा र काठमाडौंमा गरी चार दिनमा १६०० भन्दा बढी विद्यार्थीहरूलाई प्रत्यक्ष लाभ पुग्ने आयोजकको अनुमान छ। यो अवसर जीवन परिवर्तन गर्ने खालको हुन सक्ने भएकाले विद्यार्थीहरूलाई ढिलो नगरी www.deepconsultancy.com.np/workshop मा गई प्रि-रजिष्ट्रेसन गर्न आग्रह गरिएको छ।
‘अजेङ्क्या एडमिसन फेयर नेपाल २०२५’ केवल एडमिसन फेयर मात्र नभई विद्यार्थीहरूको भविष्य निर्माण गर्ने एउटा महत्वपूर्ण प्लेटफर्म हो। निःशुल्क सहभागिता, अन्तर्राष्ट्रिय स्तरको प्रशिक्षण, आकर्षक छात्रवृत्ति अवसर, नेपाली आइटी कलेजहरुको शुल्क भन्दा कम शुल्कमै अन्तराष्ट्रिय विश्वबिद्यालयको शुल्क, करिअर मार्गदर्शन, र आईटी उद्योगका अग्रणी विशेषज्ञहरूसँग प्रत्यक्ष अनुभव साट्न पाउने सुविधाले यो कार्यक्रम विद्यार्थीहरूका लागि ऐतिहासिक बन्ने अपेक्षा गरिएको छ।
यस फेयरले नेपालका विद्यार्थीहरूलाई आफ्ना सपना पूरा गर्न प्रेरित गर्ने र उनीहरूको क्षमता उजागर गर्ने विश्वास लिइएको छ। आयोजकले पोखरामा भएको पत्रकार सम्मेलनमा नेपालको सेवा–आधारित र डिजिटल–सम्बन्धित रोजगारीको सम्भावना बलियो बन्दै गएको अवस्थामा, यस्ता कार्यक्रमले विद्यार्थीहरूलाई सही दिशा दिन र राष्ट्रको डिजिटल विकासमा योगदान पुर्याउन महत्वपूर्ण भूमिका खेल्ने दावि गरे ।
