१३ असोज, काठमाडौं । कुलेखानी जलाशयको बाँधका दुवै ढोका बन्द गरिएको छ । जलाशयमा पानीको सतह स्थिर बनेपछि शनिबार रातिबाट बाँधका दुवै ढोका बन्द गरिएको हो । कुलेखानी प्रथम जलविद्युत आयोजनाका प्रमुख तारादत्त भट्टका अनुसार कुलेखानीमा हाल १ हजार ५२८ मिटर पानीको सतह मापन गरिएको छ ।
हाल कुलेखानीमा प्रतिघण्टा ३ सेन्टिमिटर प्रतिघण्टाका दरले पानीको सतह बढिरहेको उनले बताए । कुलेखानीका ३ वटै विद्युत् गृहबाट विद्युत् उत्पादन गरेर जलाशयमा पानीको सतह बढ्न नदिएको उनले बताए । शनिबार साँझ १० सेन्टिमिटर प्रतिघण्टाको दरले बढेको कुलेखानी जलाशय हाल वृद्धि दर घटिरहेको उनको भनाई छ । नेपाल विद्युत् प्राधिकरणको ‘व्याकअप’ मानिने कुलेखानी जलाशयबाट ६० मेगावाट कुलेखानी प्रथम, ३२ मेगावाट कुलेखानी दोस्रो र १४ मेगावाट कुलेखानी तेस्रो जलविद्युत आयोजना सञ्चालनमा रहेको छ ।
‘अहिले ३ वटै आयोजनाहरू नियमित चलाइएको छ । पानीको सतह बढी हुँदा नियमित गर्ने योजना नै थियो । तर, अहिले तामाकोशी जस्ता ठुला आयोजनाको विद्युत् उत्पादन बन्द हुँदा कुलेखानी नियमित चलाउनुपरेको छ । हाल जलाशयमा पानीको सतह ३ सेन्टिमिटर प्रतिघण्टाको दरले बढिरहेको छ । वर्षा रोकिएको र आयोजना सञ्चालनबाट जलाशयमा पानीको सतह वृद्धिदर कम भएकाले बाँधका ढोका बन्द गरिएको हो’ उनले भने ।
शनिबार बिहान कुलेखानी जलाशय भरिएर १ हजार ५३१ मिटर पुगेको थियो । कुलेखानीमा १ हजार ५३० मिटर मात्र पानी सङ्कलन गर्ने क्षमता रहेको छ । क्षमता भन्दा बढी पानी भरिएपछि जलाशय स्वतः ओभरफ्लो हुने गर्दछ । ओभर फ्लो भएपछि कुलेखानी जलाशयको २ वटा बाँध शनिबार दिनभर ४ मिटरसम्म खोलिएको थियो ।
