सिराहा, २० असार : यहाँको लहानस्थित रामप्रसाद उमाप्रसाद स्मारक प्रादेशिक अस्पतालका लागि मधेस प्रदेश सरकारले दुईवटा सिटी स्क्यान मेसिन उपलब्ध गराउने भएको छ । सो मेसिन खरिद प्रक्रिया अगाडि बढाइएको मधेस प्रदेश सरकारका स्वास्थ्य तथा जनसङ्ख्यामन्त्री शत्रुधनप्रसाद सिंहले जानकारी दिनुभयो ।
आज यहाँ आयोजित ‘बी एण्ड बी डेन्टल प्लस मल्टिस्पेसिलिटी क्लिनिक प्रालि’को उद्घाटन गर्दै मन्त्री सिंहले भन्नुभयो, “लामो समयदेखि यहाँका जनताको माग पुरा गर्न हामीले दुईवटा सिटी स्क्यान उपकरण खरिद प्रक्रिया अघि बढाइसकेका छौँ । अब सिटी स्क्यान गर्न विराटनगर वा जनकपुर जानुपर्ने बाध्यता हट्नेछ ।”
मन्त्री सिंहका अनुसार उक्त उपकरण खरिदका लागि रु १९ करोडको लागतमा ठेक्का प्रक्रिया अघि बढिसकेको छ । त्यसैगरी उहाँले आगामी आर्थिक वर्ष २०८२/८३ का लागि मधेस प्रदेश सरकारले स्वास्थ्य क्षेत्रमा रु ६५ करोड विनियोजन गरेको उल्लेख गर्दै निजी क्षेत्रबाट प्रदान हुने गुणस्तरीय सेवा र दक्ष चिकित्सकहरूको भूमिकाको प्रशंसा गर्नुभयो । उहाँले सरकारी शुल्कसरह लिएर पनि उत्कृष्ट सेवा दिनसक्ने निजी संस्थाहरूसँग प्रदेश सरकार सहकार्य गर्न तयार रहेको स्पष्ट पार्नुभयो ।
कार्यक्रममा क्लिनिकका संरक्षक कनैयाप्रसाद गुप्ताले सरकारी अस्पतालकै दरमा दन्त तथा मुख स्वास्थ्य सेवा दिने प्रतिबद्धता जनाउँदै, क्लिनिकमा दक्ष चिकित्सक, आधुनिक उपकरण र सहज सेवा प्रवाह प्रणालीको सुनिश्चितता रहेको जानकारी गराउनुभयो ।
