काठमाडौँ, १६ असारः राष्ट्रिय समाचार समिति (रासस)बाट प्रवाहित नेपाल भाषा समाचार सेवाबारे आवधिक समीक्षा गरिएको छ ।
राससले २०८१ कात्तिक ४ गतेदेखि मैथिली र नेपाल भाषामा समाचार बुलेटिनको प्रकाशन प्रारम्भ गरेको हो । यस अतिरिक्त राससबाट अवधी भाषाको पनि समाचार बुलेटिन प्रकाशन हुँदै आएको छ । तत्कालीन सञ्चार तथा सूचना प्रविधिमन्त्री रेखा शर्माले २०८० पुस २३ गते रासस केन्द्रीय कार्यालय, भद्रकाली प्लाजामा एक समारोहबीच मातृभाषा समाचार सेवाको उद्घाटन गर्नुभएको थियो ।
उक्त बैठकमा नेपाल भाषाबाट पत्रकारिता गर्दै आउनुभएका विभिन्न सञ्चारमाध्यम तथा प्रकाशन गृहबाट प्रतिनिधित्व गर्ने भाषा अभियन्ता तथा सञ्चारकर्मीको उपस्थिति थियो । उहाँहरुले राससबाट मातृभाषामा समाचार बुलेटिन प्रकाशन हुनु सराहनीय काम भएको उल्लेख गर्दै स्थानीय समुदायसँग जोडिएका गतिविधिको समाचारको सङ्ख्या अपेक्षाकृत रुपमा न्यून भएकोतर्फ रासस व्यवस्थापनको ध्यानाकृष्ट गराउनुभएको थियो ।
मातृभाषाको समाचार बुलेटिनमा पनि राज्य पक्षकै समाचार एकतर्फी रुपमा प्रवाहित भएको अनुभूति आफूहरुले गरेको उहाँहरुको भनाइ थियो । मातृभाषा समाचार सेवाको थालनीपछि अबको चरणमा यस सेवालाई थप सुधार गरी प्रभावकारी र व्यापक बनाउँदै लग्नुपर्ने आवश्यकतामाथि जोड दिँदै उहाँहरुले बढीभन्दा बढी स्थानीय गतिविधिलाई रासस समाचार बुलेटिनमा स्थान दिलाउन समाचार सङ्कलन र सम्प्रेषणमा हातेमालो गर्नुपर्ने दायित्वबोध नेवाः समुदाय स्वयंले पनि गरेको र सोही अनुरुप सहकार्य गरी अघि बढ्न सकिने धारणा राख्नुभएको थियो ।
भाषिक शुद्धतामा ध्यान दिन, स्थलगत रुपमै समाचारदाताको परिचालन प्रबन्ध गर्न र नेवाः समुदायको बढी मात्रामा गतिविधि हुने काठमाडौँ उपत्यकाका लागि छुट्टै समाचारदाताको व्यवस्था गर्न उहाँहरुले सुझाव दिनुभएको छ ।
उक्त बैठकमा रमेशकाजी स्थापित (गोरखापत्र दैनिक), नरेशवीर शाक्य (इलोहं प्रकाशन), सुरेश किरण मानन्धर (भाषा आयोग सदस्य), नृपेन्द्रलाल श्रेष्ठ (लहना न्युज डटकम), सुरेशप्रसाद सायेजू (रेडियो जनसञ्चार), सुजीब बज्राचार्य (नेवाः अनलाइन न्युज), सुगतरत्न सिन्दुराकार (सम्यक वाःपौ), रत्नकाजी महर्जन (मेरो साप्ताहिक), सुरेन्द्रभक्त श्रेष्ठ (लहना साप्ताहिक), रामकृष्ण खड्गी (नेपाः टिभी) र दानदास श्रेष्ठ (स्वतन्त्र सञ्चारग्राम) सहभागी हुनुहुन्थ्यो ।
राससका कार्यकारी अध्यक्ष धर्मेन्द्र झाले नेपाल भाषा पत्रकारितामा आबद्ध सञ्चारकर्मीबाट आएका सुझावलाई यथाशक्य ग्रहण गर्दै यस सेवालाई आगामी दिन थप परिमार्जन गर्न सहकार्य गर्दै जाने बताउनुभयो । उहाँले राससको मातृभाषा समाचार डेस्कको स्थायित्वका लागि एक कोष स्थापना गर्नुपर्छ भन्ने अवधारणा रासस व्यवस्थापनले बनाएको जानकारी दिँदै यस अभियानका लागि पैरवी गरिदिन पनि आग्रह गर्नुभयो ।
