किएभ, १९ चैत : जर्मन विदेशमन्त्री एनालेना बारबकले मङ्गलबार किएभको भ्रमणमा आइपुगेपछि रुसी राष्ट्रपति भ्लादिमिर पुटिनलाई युक्रेनमा युद्धको वार्तामा ‘समयका लागि खेलिरहेको’ आरोप लगाउनुभएको छ ।
“युक्रेन तत्काल युद्धविरामका लागि तयार छ । पुटिन नै समयको लागि खेल्दै हुनुहुन्छ, शान्ति चाहनुहुन्न र अन्तर्राष्ट्रिय कानूनको उल्लङ्घन गर्ने उहाँको आक्रमणको युद्ध जारी राखिरहनुभएको छ”, बारबकले आफ्नो मन्त्रालयद्वारा साझा गरिएको विज्ञप्तिमा भन्नुभयो ।
“उहाँ वार्ताको इच्छा देखाउँदै हुनुहुन्छ तर आफ्ना लक्ष्यहरूबाट एक इन्च पनि हट्नुहुन्न”, बारबकले युद्ध सुरु भएदेखि युक्रेनको आफ्नो नवौँ भ्रमणमा भन्नुभयो ।
मार्च ११ मा अग्रिम मोर्चामा सङ्घर्ष गरिरहेको युक्रेनी सेना र संयुक्त राज्य अमेरिकाले रुससँग ३० दिने युद्धविरामको योजनामा सहमति जनाएका थिए । तर पुटिनले अमेरिकी प्रस्ताव अस्वीकार गर्नुभएको छ र युक्रेनमा नयाँ नेतृत्व स्थापना गर्ने मस्कोको चाहनाबारे आफ्नो बयानबाजी बढाउनुभएको छ ।
बारबक अमेरिकी राष्ट्रपति डोनाल्ड ट्रम्पको पुनः निर्वाचनपछि पहिलो पटक किएभ भ्रमणमा आउनुभएको हो । ट्रम्पले द्वन्द्व अन्त्य गर्न युरोपेली नेताहरूमाथि रुससँग सम्पर्क गरेर अमेरिका–युरोप सम्बन्धलाई उथलपुथल गर्नुभएको छ । नीतिमा परिवर्तनले नाटो गठबन्धनको भविष्यबारे चिन्ता उत्पन्न गरेको छ र युरोपलाई आफ्नै रक्षा क्षमता बढाउन र युक्रेनलाई आफ्नो समर्थन बढाउनमा केन्द्रित गर्न प्रेरित गरेको छ ।
जर्मनीले परम्परागत रूपमा कडा ऋण नियमहरूलाई सहज बनाउने एउटा ठूलो नयाँ खर्च प्याकेज अपनाएपछि गत मार्चमा युक्रेनलाई तीन अर्ब युरो (तीन अर्ब २५ करोड डलर) को नयाँ सैन्य सहायता स्वीकृत गरेको थियो । “संयुक्त राज्य अमेरिका र रुसबीचको गतिरोधलाई ध्यानमा राख्दै हामी युरोपेलीहरूले युक्रेनको पक्षमा उभिएको देखाउनु… र अहिले भन्दा बढी यसलाई समर्थन गर्नु अत्यन्त महत्त्वपूर्ण छ”, बारबकले भन्नुभयो ।
सोमबार युक्रेनको बुचा सहरमा स्मरण समारोह आयोजना गरिएको थियो । त्यहाँ रुसी सेनामाथि तीन वर्षअघि सयौँ नागरिकको हत्या गरेको आरोप लगाइएको छ ।
