विराटनगर, २१ फागुन : कोशी प्रदेशका मुख्यमन्त्री हिक्मतकुमार कार्कीले योजना बैंकबाट प्रदेश सरकारलाई बजेट निर्माणका लागि थिति र विधि बसाल्न मद्दत गर्ने बताउनुभएको छ ।
कोशी प्रदेश योजना आयोगद्वारा आज आयोजित ‘कोशी प्रदेशस्तरीय आयोजना तर्जुमासम्बन्धी अन्तरक्रिया’ मा उहाँले योजना बैंकको अवधारणले योजना व्यवस्थित हुने भन्दै यसबाट बजेटमा पर्ने योजनाको असन्तुलनलाई घटाउने विश्वास व्यक्त गर्नुभयो ।
मुख्यमन्त्री कार्कीले भन्नुभयो, “प्रदेश सरकारको स्रोतसँगै बैंकको योजना पनि कम बेसी भइरहन्छ ।” बसाइँसराइको समस्या रोक्न मध्यपहाडी क्षेत्रमा शिक्षण अस्पतालको आवश्यकता भएकाले ताप्लेजुङ र धनकुटाको अस्पताललाई स्तरोन्नति गरेको जानकारी दिँदै उहाँले भन्नुभयो, “हिमाल र पहाडका दुई वा दुईभन्दा बढी सामुदायिक विद्यालय आपसमा मर्ज भएमा प्रदेश सरकारले पूर्वाधार, छात्राबास र भवन निर्माणमा सहयोग गर्छ ।”
मुख्यमन्त्री कार्कीले रू ५० लाखभन्दा कमको योजना बैंकमा समावेश नगर्न कोशी प्रदेशसभाका सदस्यलाई आग्रह गर्दै प्रदेश सरकार र स्वीस सरकारको संयुक्त लगानीमा प्रदेशमा चार वटा पदमार्ग निर्माण हुने जानकारी दिनुभयो । उहाँले सङ्घीय सरकारबाट प्रदेश सरकारलाई प्राप्त हुने अनुदान कटौती हुँदै जानु चिन्ताको विषय भएको भन्दै सरकार आन्तरिक आय बढाउन आयआर्जन हुनसक्ने क्षेत्रमा लगानी गर्न तयार रहेको बताउनुभयो ।
मुख्यमन्त्री कार्कीले यस वर्ष अलैँचीको मूल्य वृद्धिले पहाड छाडेर अन्यत्र बसेका मानिस पुनः पहाडतर्फ फर्कनु खुसीको विषय भएको उल्लेख गर्दै प्रदेश सरकारको पुल र बाटो बाहेक अन्य बहुवर्षीय योजना नहुने उल्लेख गर्नुभयो । उहाँले कृषि आँैजार र आर्गानिक मल उत्पादन गर्न चाहनेलाई सरकारले सहयोग गर्ने भन्दै कोशी प्रदेशसभाका सदस्यले छान्ने योजनामा ४० प्रतिशत उत्पादन र उत्पादकत्व बढाउने र ६० प्रतिशत पूर्वाधारका हुनुपर्छ भन्नुभयो ।
आर्थिक मामिला तथा योजनामन्त्री रामबहादुर मगरले पर्यटकको नाममा जथाभावी खर्च गर्ने बानी हटाउनुपर्ने भन्दै चोर बाटोबाट योजना समावेश नहोस् भनेर योजना बैंकको व्यवस्था गरेको जानकारी दिनुभयो । कोशी प्रदेशसभाका सभामुख अम्बरबहादुर विष्टले आयआर्जन गर्न सकिने क्षेत्रमा लगानी गर्न प्रदेश सरकारलाई आग्रह गर्नुभयो ।
