मातृभाषामा समाचार सेवा प्रारम्भ गर्ने राससको प्रयास प्रशंसायोग्य छः सचेतक लामा

काठमाडौँ, ५ फागुन: मुलुक दूरदराजका गाउँबस्तीमा पुगेर समाचार सङ्कलन गर्न राष्ट्रिय समाचार समिति (रासस)ले लिएको लक्ष्य सकारात्मक छ । चौबिस घन्टा सेवा र स्वतन्त्र भएर काम गर्ने अठोट सराहनीय छ । तथापि, संसद्का गतिविधिसम्बन्धी समाचार सम्प्रेषणप्रति महिला सांसदको गुनासो छ । हाम्रा आवाजलाई स्थान दिइएन भन्ने सुनिएको छ । त्यस्ता विषयमा राससजस्ता सञ्चारमाध्यमले ध्यान पुर्‍याउनुपर्छ ।

कार्यपालिका, व्यवस्थापिका र न्यायपालिकाका समसामयिक विषय जनतामा पुर्‍याउने प्रतिबद्धतासँगै आवाजविहीनका आवाज उठान गर्ने माध्यम रासस बन्न सक्नुपर्छ । विभिन्न मातृभाषामा समाचार दिने राससको प्रयास प्रशंसायोग्य छ । काठमाडौँ उपत्यकाभित्रै पनि भक्तपुर र ललितपुरका ग्रामीणबस्तीमा नेपाल भाषा बोल्ने ज्येष्ठ नागरिकले अझै पनि प्रष्ट नेपाली बोल्न सकेको पाइँदैन । हाम्रा संस्कार र संस्कृति बचाउन थप मातृभाषामा समाचार सेवा विस्तारको अठोटमा हाम्रा तर्फबाट साथ र सहयोग रहनेछ तर समाचार सत्ता, शक्ति र व्यक्ति केन्द्रित हुनुभएन । जनताको सामूहिक आवाजलाई प्रखर रूपमा सरकारसामु पुर्‍याउन सक्नुपर्छ ।

(राससको ६४ औँ वार्षिकोत्सवका सन्दर्भमा आयोजित अन्तर–संवादमा राष्ट्रिय प्रजातन्त्र पार्टीका सचेतक वीना लामाबाट व्यक्त विचार)