महोत्तरी, १३ पुसः नेपाल कम्युनिष्ट पार्टी (एमाले) का महासचिव शङ्कर पोखरेलले जनहितका पक्षमा काम गर्न एमाले प्रतिबद्ध रहेको बताउनुभएको छ । आज महोत्तरीको रामगोपालपुरमा आयोजित जनसभालाई सम्बोधन गर्दै उहाँले पछिल्लो एकदशकमा मधेशको विकासमा एमालेले योजनबद्ध रूपमा काम गरिरहेको बताउनुभयो ।
गत आम निर्वाचनमा मधेशका कूल प्रतिनिधिसभा र प्रदेशसभामा सबैभन्दा बढी सिट एमालेले पाएको सम्झना गर्दै यहाँका नागरिकले पार्टीले गरेको कामको उचित मूल्याङ्कन गरेर मतदान गर्नुभएको महासचिव पोखरेलको भनाइ छ ।
“मधेशमा कैयौँ वर्षदेखि हुलाकी सडकको काम अलपत्र थियो, एमाले नेतृत्वको सरकारले यसलाई गति प्रदान ग¥यो, अहिले हुलाकी सडकको कामले निकै फड्को लगाइसकेको छ”, उहाँले भन्नुभयो, “मधेशका जनताको जीवनस्तर उकास्ने पार्टीले योजनाबद्ध रूपमा काम गरिरहेको छ ।”
एमाले नेतृत्वको सरकार रहेका बेला मधेशका कतिपय रुग्ण अवस्थामा रहेका आयोजना सम्पन्न भएका र कतिपयमा काम भइरहेका महासचिव पोखरेलले बताउनुभयो । महोत्तरीको सन्दर्भमा जलेश्वर नगरको आधुनिक विकास, जलेश्वर–रामगोपालपुर–बर्दिबास सडकको स्तरोन्नति र जयनगर बर्दिबास रेल्वेको कामले एमाले नेतृत्वको सरकारका समयमा भएको उहाँको भनाइ छ ।
मधेशमा भएका कामको लेखाजोखा गरेर जनताले एमालेप्रति विश्वास बढाएका पोखरेलले बताउनुभयो । “गत आमनिर्वाचनमा जनताले महोत्तरीमा एक प्रतिनिधिसभा र दुई प्रदेशसभा सदस्यलाई प्रत्यक्ष निर्वाचनमा पजताउनुभएको थियो”, उहाँले भन्नुभयो, “हालै सम्पन्न स्थानीयतह उपनिर्वाचनमा यहाँ एकमात्र वडामा भएको निर्वाचनमा पनि जनताले एमालेलाई रोज्नुभएको छ ।” यो विश्वासको जग अझ मजबुत बनाउँदै आगामी २०८४ को निर्वाचनमा एमालेलाई बहुमत दिन उहाँले जनतासमक्ष आग्रह गर्नुभयो ।
जनसभामा एमालेका पोलिटब्यूरो सदस्य सुमनराज प्याकुरेल र केन्द्रीय सदस्य एवं मधेश सरकारमा भौतिक पूर्वाधारमन्त्री सरोजकुमार यादवले पछिल्लो समय मधेशमा योजनाबद्ध कामको थालनी भएको बताउनुभयो ।
नेकपा (एमाले)का महोत्तरी जिल्ला अध्यक्ष बलिराम यादवको अध्यक्षतामा सम्पन्न सभामा एमाले प्रवेश गर्ने व्यक्तिहरूलाई महासचिव पोखरेलले स्वागत गर्नुभएको थियो ।
