१५ कात्तिक, काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङले तिहारमा धेरै भन्दा धेरै विद्युत खपत गर्न आग्रह गरेका छन्। कार्यकारी निर्देशक घिसिङले खपतका लागि पर्याप्त विद्युत भएकाले तिहारमा जतिसक्दो बढी प्रयोग गर्दा पनि लोडसेडिङ नहुने बताएका हुन्।
उनले कुनै प्राविधिक समस्याबाहेक लक्ष्मीपूजामा बत्ती नजाने पनि स्पष्ट पारे। यस वर्षको तिहारमा मुलुकभित्र पुग्ने विद्युत उत्पादन भइरहेको भन्दै तिहारमा आयात पनि गर्नुपर्ने अवस्था नरहेको उनको भनाइ छ। सकेसम्म तिहारमा देशभित्रको खपत पुर्याएर निर्यात समेत गर्न पुग्ने विद्युत प्राधिकरणसँग रहेको जानकारी पनि उनले दिएका छन्।
घिसिङले असोज दोस्रो साता आएको बाढीले ४५६ मेगावाटको माथिल्लो तामाकोसीसहित केही जलविद्युत आयोजनामा ठूलो क्षति गरेको र अधिकांश आयोजना नदी प्रवाहमा आधारित रहेका कारण हिउँदमा भने आयात गरेर व्यवस्थापन गर्नुपर्ने बताएका छन्।
अहिले २१ सय मेगावट क्षमताका आयोजना सञ्चालनमा रहे पनि उत्पादन घटेर १९ सय मेगावाटमा झरेको उनको भनाइ छ। यस वर्ष बाढीपहिरोले जलविद्युत आयोजनाहरूमा क्षति पुगेका कारण हिउँदमा थप विद्युत आयात गर्नुपर्ने प्राधिकरणको आकलन छ।
घिसिङले भने, ‘मुख्य गरेर यो वर्ष वर्षातको कारण आएको बाढी पहिरोको कारणले जलविद्युत क्षेत्रमा ठूलो क्षति पुगेको छ। प्राधिकरण र निजी क्षेत्र दुवैमा क्षति पुगेको छ। तामाकोसी ४६५ मेगावट अहिले पनि आउट छ । प्रसारणलाइन बगाएको हुनाले काबेली करिडोरको करिब २ सय मेगावटका आयोजना आउट छन्। करिब ७ सय मेगावाट जलविद्युत प्रणालीभन्दा बाहिर छ। त्यसबाट राजस्व संकलनमा ठूलो घाटा भएको छ। मर्मतको लागि प्राधिकरणले ठूलो रकम खर्च गर्नुपर्ने अवस्था छ। यति हुँदा पनि हामीलाई पुग्ने विद्युत उत्पादन छ। तर तिहारको लागि हाम्रो उत्पादनले हामीलाई पुग्छ। अहिले पनि निर्यात गरिरहेका छौँ।’
तिहारको लक्ष्मीपूजाका दिन सबैभन्दा धेरै बिजुली खपत हुने गरेको छ।
