१३ असार, कास्की : गण्डकी प्रदेशसभाको रोस्ट्रममै आगामी आर्थिक वर्षको वार्षिक विकास कार्यक्रम पुस्तिका च्यात्ने सांसदप्रति भौतिक पूर्वाधार विकास तथा यातायात व्यवस्थामन्त्रीले असन्तुष्टि पोखेका छन् ।
मन्त्रालयअन्तर्गत उठेका प्रश्नको शुक्रबार जवाफ दिने क्रममा मन्त्री प्रकाशबहादुर केसीले बजेट पुस्तिका च्यात्नैपर्ने गरी बजेट विनियोजन नभएको जिकिर गरे । बजेट पुस्तिका च्यातेका सांसद रेशमबहादुर जुग्जाली भौतिक पूर्वाधारमन्त्री हुँदा विनियोजन गरेको र हाल विनियोजित बजेट अंकमा धेरै भिन्नता नरहेको उनले बताए । ‘त्यतिबेला उहाँले उक्त जिल्लामा ७१ करोड ५० लाख विनियोजन गर्नुभएको रहेछ । हाल विनियोजन भएको म्याग्दी जिल्लाको बजेट रकम ६० करोड ७७ लाख छ,’ उनले थपे, ‘यसअघि विनियोजित रकम र आगामी आर्थिक वर्षमा प्रस्तावित रकममा खासै भिन्नता देखिँदैन । बजेट पुस्तिका च्यातिहाल्ने अवस्थामा पुग्नुपर्ने जस्तो मलाई लाग्दैन ।’
म्याग्दीमा ५२ करोड ७१ लाख रुपैयाँ स्रोत सुनिश्चित भएका बहुवर्षीय योजनाको दायित्वका लागि विनियोजन भएको मन्त्री केसीले बताए । प्रतिपक्षीको भूमिका निभाउन बजेट पुस्तिका च्यातिएको हुन सक्ने भन्दै उनले व्यंग्य गरे ।
मन्त्रालयअन्तर्गत विनियोजित बजेट छलफलमा भाग लिने क्रममा सांसद जुग्जालीले असार ९ मा रोस्ट्रममै पुस्तिका च्यातेका थिए । म्याग्दीको भौगोलिक अवस्था बुझाउन भौतिक मन्त्री र अर्थ मन्त्रीलाई व्यक्तिगत खर्चमा जिल्ला भ्रमण गराउने भन्दै उनले आक्रोश पोखेका थिए ।
